O Concello de Rianxo conta cuns espazos susceptibles de convertérense en puntos de dinamización social e ambiental, para dar cabida a iniciativas e proxectos que lle permitan á cidadanía ser participe dun cambio no paradigma do consumo.

A idea que formulamos con este proxecto é converter o que chamamos «residuos» en recursos, abrindo novas posibilidades en pro de romper o círculo de ser suxeitos pasivos do sistema actual, de usar e tirar, con todas as consecuencias negativas que ten para o noso medio e o noso desenvolvemento persoal.

En determinados momentos temos a intención de tentar recuperar, reparar ou modificar algún aparello, utensilio ou ferramenta que deixou de funcionar, que pertencía a algún/a achegado/a, que atopamos, que nos gusta a súa estética… e vémonos limitados/as por carecer de coñecementos, medios ou ideas. O que imos tentar crear é un lugar onde poidamos desenvolver o noso potencial, contando cos medio axeitados e con axuda doutras persoas participantes, e onde prevalecerá sempre a seguridade.

Para conseguir estes obxectivos é preciso realizar unha serie de accións formativas que nos permitan adquirir as destrezas necesarias para poder desenvolver as nosas ideas e inquedanzas.

A formación que se dará será a seguinte: electrónica, carpintería, mecánica e acabados. Como participante, axudarás a crear un lugar onde as túas ideas se convertan en realidades.